طرحتك في سنة أولى حجاب

طرحتك في سنة أولى حجاب


كل بنت قررت إنها تتحجب بتبتدي تفكر..
إزاي تربط الطرحة بطريقة شيك
وإزاي تختار طرح تناسب اللبس بتاعها
علشان كده

قررنا نساعد كل البنات الصغيرة في سنة أولى حجاب
ونقول لهم على خطوات بسيطة للربطات

وكمان نعرّفهم أحدث أشكال واستايلات الطرح
وقابلنا خبيرة الماكياج ومصممة لفات الطرح
"مروة حامد"
اللي هتعرّفنا طرق بسيطة وشيك لربطات الحجاب

إيه الأشكال الجديدة دلوقتي في الطرح اللي بتناسب البنات في سنة أولى حجاب؟
أولاً نصيحتي لكل البنات المحجبات وخصوصاً البنات الجديدة في الحجاب إنهم يشتروا مقاسات مختلفة من الطرح، وموجود دلوقتي في السوق طرح جاهزة مستطيلة ومربعة ومثلثة، وكمان فيها حركات وشراشيب وخرز وأحجار ورسومات، ودي بتساعد إن الربطات تكون حلوة وشيك واستايل؛ بالإضافة إلى أن الباندانات دلوقتي منها أشكال ومساحات مختلفة وألوان كثير

وإيه الحاجات الأساسية اللي البنات لازم تعرفها لما تربط الطرحة؟

أول حاجة لازم تعمل شعرها كحكة وتلبس باندانة قطن كاملة على رأسها لأنها مفيدة وبتمنع تساقط الشعر، وتحاول تجيب دبابيس صغيرة جداً، وتلف أي طرحة على كحكة رأسها كويس أوي علشان اللفة تكون مظبوطة, والربطات تكون بسيطة, والطرح لا تزيد عن طرحتين، وتستخدم الباندانا كبديل عن الطرحة الأولى, وتحاول تبعد عن الألوان الكثيرة والرسومات الضخمة.

وإزاي البنت تربط الحجاب بتاعها بطريقة تناسب حجم وجهها؟

في قواعد أساسية لازم البنت المحجبة جديد تعرفها علشان شكلها يكون كويس والحجاب يخلي شكلها صغير...

لو جبهتها عريضة.. تربط الطرحة فوق حواجبها.
لو جبهتها صغيرة. تربط الطرحة في آخر القورة.
لو ملامح وجهها فيها عيوب مثلاً الأنف كبيرة شوية تحاول تبعد عن اللفات الاسبانش أو الطرحة الماسكة على وجهها، وتحاول تعمل ربطة منفوشة وتحط إكسسوار على الطرحة، وتحاول تشغل عيون الناس عن إنها تركز على منطقة الأنف.

ونفس الحكاية لو الشفايف كبيرة الطرحة تكون منفوشة وتعمل ماكياج كتير على عينها، وتكتفي بملمع بسيط جداً على الشفايف..
إيه لفات الطرح اللي بتناسب أحجام الوجه المختلفة؟
في حالة الوجه البيضاوي.. فمعظم الربطات تتناسب معاه، يعني الربطة الاسبانش أو الربطة اللي على جنب أو الكروس أو المقفولة من قدام.
في حالة الوجه المدور.. تبعد عن لفة الطرح على جنب لإنها بتزيد من مساحة الخدود، وتحاول تعمل ربطة زي شينيو عالي علشان تخلي الوش رفي
في حالة الوجه المربع أو المستطيل.. تحاول تنزل بالطرحة وتقفل الجبهة وتعمل كمان كروس طرحة عكس الثانية.
في حالة الوجه الطويل. تعمل الطرحة على تحت ونقصر الجبهة وتعمل الربطات على وراء وعلى جنب.
يعني دي قواعد عامة لكن في النهاية إحساس البنت بعد ربطة الحجاب هو اللي بيدل على إن اللفة دي مناسبة معاها.
وإيه الموضة الجديدة في أشكال ونقشات الطرح؟
الموضة السنة دى إن الإيشاربات تكون خفيفة وقصيرة؛ يعني فيه إيشاربات مربعة مجرد تانية على تانية بيكون زي شكل المنديل، وميزته أنه خفيف جداً والموضة كمان الإيشاربات المثلثات لإنها بتسهل كثير على البنات أنها تربط الحجاب كويس..

فمثلاً لو الوجه رفيع.. تجيب الإيشارب المثلث وتربط الطرفين اليمين والشمال وتكون الأطراف نازلة على الظهر ممكن تجيبهم على الجنب.

ولو الوجه مليان تعمل الربطة على ورا.
معظم البنات دلوقتي عايزين يصغروا وجههم لما يلبسوا الطرحة يعملوا إيه ويكون بطريقة إستايل؟
أفضل طريقة لتصغير الوجه وخصوصاً البنات الصغيرة هي فكرة الكروس، يعني إيشارب موجود على الرأس، والثاني يكون مواجه له بالعكس، والكروس بيقسم الوجه ويخفف من حدة الجبهة العريضة.

وفي طريقة تانية لتصغير شكل الحجاب، وهي إنك بعد ما تربطي الطرحة تجيبي طرف من الطرحة وتسيبيه ينزل على الكتف مع جزء من الوجه ويبقى كده قصرت وصغرت جزء من الوجه.

عايزين نتعرف على ربطات سهلة وبسيطة وتناسب البنات الصغيرة؟

دلوقتي هاقدم لكم لفة بسيطة..

وهي اللفة الموف على الفستان الموف في الأبيض وطريقتها سهلة جداً.

تجيبي طرحتين واحدة ساتان موف، وفيها شراشيب، والتانية نفس اللون لكن نقشتها مختلفة، وتستخدم كاسكارف على الرق

وطريقة اللفة..
تجيبي الطرحة الساتان الموف اللي فيها شراشيب، وتربطي ناحية طويلة وناحية قصيرة حول كحكة الشعر من وراء، وبعد كده تجيبي الطرف الطويل اللي على اليمين وتقلبيها على الرأس، وكإنها طرحة عادية تنزل على الناحية الثانية مستريحة من غير ما أضغطها بدبابيس, أما الطرف الشمال هيكون نازل على الكتف من وراء.

وبعد كده تجيب الطرحة الاسكارف وتلفها على الرقبة وتداري بها منطقة الرقبة وشكلها يكون مكمل للطرحة الرئيسية.



وطريقة الكروس أعملها إزاي؟

أولاً إحنا اتفقنا إن بداية أي ربطة لازم ألم الشعر على كحكة؛ لإنها بتسهل ربطة أي إيشارب بعد كده...

1 ـ تجيبي طرحة مستطيلة وتربطها كويس على الكحكة.

2 ــ تجيبي طرحة تانية مستطيلة وتلبسيها من وراء بطريقة خلفية وتعملي لها كروس على قدام.

3ـ بعد كده تلمي كل الأطراف، المهم مع بعض على وراء، وأشوف بعد كده استخدمهم في إيه.

وفيه دلوقتي كمان بندانا كروس جاهزة لكن الإيشاربات بتكون أشيك.



وإيه الأوقات المناسبة للبس الطرحة البدوي؟
اللفة البدوي دلوقتي موضة جداً خصوصاً في سهرات رمضان، وكمان ممكن ألبسها في ليلة الحنة أو في أعياد ميلاد، وكمان مناسبة جداً في الأفراح الإسلامية وفي أي سهرات بعد الظهر.

وإيه الأوقات المناسبة للبس الطرحة البدوي؟

اللفة البدوي دلوقتي موضة جداً خصوصاً في سهرات رمضان، وكمان ممكن ألبسها في ليلة الحنة أو في أعياد ميلاد، وكمان مناسبة جداً في الأفراح الإسلامية وفي أي سهرات بعد الظهر.

واللفة البدوي أربطها إزاي بطريقة سهلة؟

اللفة البدوي اللي موجودة في الصورة هي عبارة عن طرحة واحدة.

وطريقة اللفة

• أجيب طرحة مستطيلة خفيفة، وبعدين أربطها على الرأس وأقفلها من وراء.

• بعد كده أحط الإكسسوار المناسب في النصف.

• وبعد كده أطلع طرف الطرحة من وراء على الإكسسوار.

• وبعدها أثبت الطرحة مع الإكسسوار بدبابيس صغيرة جداً.

• أما طرف الطرحة الثاني أجيبه على جنب لينزل على الصدر.

• وممكن أجيب إكسسوار على الصدر يناسب الشكل البدوي.



عايزين نتعرف على لفه سهلة لا تحتاج دبابيس كثير؟
فيه لفة مش محتاجة لدبابيس زي اللي موجودة في الصور، ومكونة من طرحتين لونهم برتقالي × مسطردة، وفي الأول هي محتاجة طرحتين, الطرحة الأولى مستطيلة لونها برتقالي.

والطرحة الثانية طويلة وتكون قطن خفيف أوي ولونها مسطردة.

وطريقة اللف سهلة أوي...
• نربط الطرحة الأولى البرتقالي من وراء على كحكة الرأس زي ما اتفقنا، ويا ريت كمان نرفع الشعر لفوق على شكل شينيو علشان يكون عامل زي الصورة بالظبط.

• بعد كده أجيب الطرحة القطن وأحطها في الأول على شكل كوفيه حول الرقبة.

• وبعد كده أطلع بطرف الطرحة من وراء على الشينيوه العالي.

• أنزلها على الجنب اليمين بطريقة عشوائية يعني مش مربوطة بإحكام.

• وبعد كده الطرف الثاني ألفة على الرقبة بطريقة الاسكارف وفي النهاية أكون عملت شكل (انسيابي) للطرحة وبسيط ومش محتاج دبابيس ولا حاجة

وإيه الأفكار البسيطة والمناسبة للإيشارب المثلث؟

أنا عاملة نموذج للإيشارب المثلث بطريقة بسيطة وتناسب الصبح ولونه أبيض x أسود وهو عبارة عن طرحة مستطيلة سوداء وإيشارب مثلث أسود × أبيض.
وطريقة اللفة

• أربط الطرحة المستطيلة السوداء أوي على كحكة الشعر.

• بعد كده أجيب الإيشارب المثلث وأربطه على الطرحة المستطيلة من وراء.

• وميزة الإيشارب المثلث إنه بيكون قصير وبسيط وعلشان كده من الأفضل إنه يتلبس على بلوزة (هاي كول) علشان تغطي منطقة الرقبة.

وإيه اللفات البسيطة اللي بتناسب الفساتين الطويلة والتونيك الطويل؟

أنا عندي نموذج عملته على موديل لابسة جلابية فلاحي، واللفة دي سهلة أوي مع إنها تظهر إنها صعبة، وهي محتاجة طرحتين...

طرحة قطن وطرحة شيفون فيها نفس الإطار اللي على الفستان...

وطريقة اللفة

• في الأول أجيب جزء من الطرحة اللي فيه الإطار وأبدأ به، وأربطها عدل على الرأس وأسيبها على الظهر.

• بعد كده أجيب طرف الطرحة وأداري بيها نصف الجبهة وأطلع بيها بطريقة (زي العمة).

• وبعد ما أرفعها لنصف الرأس وأجيبها من الطرف اليمين وأسيبها نازلة على الكتف.

• بعد كده أجيب الطرحة القطن وأحطها من نصف الرأس زي طرحة العروسة، وأشبكها مع الطرحة الثانية بالدبابيس الصغيرة.

• وبعد كده ممكن أجيب إكسسوار من نفس محتويات شكل العباية أو التونك أو الفستان أو الجلابية، وألفه على الوش والطرح، زي ما هو موجود في الصورة.

فيه بنات كتير بتحب تلبس طرحة واحدة... إزاي تربطها بطريقة استايل وبسيطة؟
أنصح البنات اللي عايزين يلبسوا طرحة واحدة لازم يختاروا فيها شغل وحركات علشان تساعدهم في إن اللفة تكون روشة.

وطريقة اللفة

• أجيب طرحة صوف وأثبتها من قدام وأربطها من وراء بدبوس (بمعنى أقابل الطرف اليمين والشمال مع بعض بدبوس)، وده عكس الطرح التانية مش هاربطها على الكحكة لإن القماش الصوف (سميك أوي)

• وبعد كده أمسك طرف منهم من وراء وأطلع به على الرأس من قدام وأنزله على الجنب.

• وبعد كده أمسك الطرف الثاني وأجيبه خلف خلاف الطرف الأول، واللي هيكون فيه شراشيب وأدخله من تحت الطرحة.



وإيه الجديد في ربطات الاسبانش؟

الجديد هو إني أختار أقمشة ملونة وكاروهات أعمل بها اللفة الاسبانش زي ما هو موجود في الصورة بموديل ربطة لفة اسبانش، وهو عبارة عن...

طرحة مستطيلة وطرحة مستطيلة كاروهات واسكارف شبيكة بيج.

وطريقة اللفة

• أربط الطرحة المستطيلة على كحكة الشعر من وراء .

• وبعد كده أجيب الطرحة الكاروهات وأحطها بطريقة مايلة شوية تظهر جزءاً بسيطاً من الطرحة اللي تحتها، وأربطها على وراء.

• في الآخر أثني الاسكارف الشبيكة وأحطه آخر حاجة على الطرحتين في نصف الرأس.

• وفى الآخر أجيب الأطراف كلها على جنب.






وعامله كمان نموذج لفة اسبانش لطرحة لونها أبيض في أحمر، والربطة دي كاجوال وبسيطة جداً...

عبارة عن طرحتين طرحة مستطيلة حمراء، وطرحة حرير أو شيفون أبيض في أحمر.

وطريقة اللفة

• نبدأ نربط الطرحة المستطيلة الحمراء على الرأس من وراء كويس أوي.

• بعد كده نجيب الطرحة التانية ونربطها على الطرحة المستطيلة الحمراء.

• نلف طرف من الطرحة على الكحكة والطرف التاني ينزل على الكتف من الجنب.



ولغاية هنا خلص الموضع ايه رايكوا